Песәй мәдәният йорты хәбәр итә

 8 март халыкара хатын- кызлар көне- язның иң күркәм бәйрәме. Шушы уңайдан, Песәй авылы мәдәният хезмәткәрләре Фирдәвес Рәхмәтуллина, Рафаэль Кабировлар бәйрәмгә бик күп чаралар әзерләделәр. Шуларның иң беренчесе: 6 нчы март көнне уздырылган "Рәхмәт сезгә, әниләр!" дип исемләнгән кичә. Әлеге чарада авылыбызның ак яулыклы апалары катнашты. Аларга чәй өстәле һәм күңелле концерт әзерләнде. 7 нче март исә бәйрәм вакыйгаларына бик бай булды. Иртә белән сәгать  9 да "Чулпан" балалар бакчасында уздырылган бәйрәм иртәсендә  Рафаэль Кабиров уйнаган  матур көйләр астында, нәниләр әниләрен җырлар, биюләр белән сөендерделәр.  Көндезге 11 сәгатьтә бәйрәм рухы мәктәп кысаларында хөкем сөрде. Мәдәният хезмәткәрләре " Әни - иң матур сүз" дигән кичәгә күңелле күренешләр, җырлар  әзерләүдә укучыларга зур булышлык күрсәттеләр. Шул ук көнне  мәдәният йортында Тәкәш һәм Песәй авылы үзешчәннәре көче белән әзерләнгән " Җырлар бәйләме сезгә, хатын -кызлар!" дип исемләнгән концерт булып узды. Бәйрәмдә яңгыраган җырлар,башкарылган биюләр, сәхнәләштерелгән күренешләр  һәркемнең кәефен күтәрде. 8 нче март көнне  Песәй авылы үзешчәннәре Тәкәш халкына бәйрәм концерты бүләк итте. Тамашачылар, алкышлар аркылы, үзләренең никадәр дәрәҗәдә канәгать булуларын һәм рәхмәт хисләрен аңлата алдылар.