Татарстанда гыйнвар аенда торак йортларга ипотеканың кискен артуы күзәтелә
Узган елның гыйнвар ае белән чагыштырганда бу күрсәткеч 36% ка күбрәк .
Әйтик, агымдагы елның беренче аенда Татарстан Росреестры тарафыннан 700 гә якын ипотека торак йортларына теркәлгән инде. Шулай ук татарстанлылар ипотекага җир участокларын да актив сатып ала: 2022 елның гыйнварында шундый 2,4 мең объект теркәлгән.
«Узган ел гыйнвар аенда нәкъ менә җир кишәрлекләренә ипотеканың кискен артуы күзәтелсә, быел – торак йортларга. Шәһәр читендәге күчемсез милеккә ихтыяҗ элеккечә ачык, - дип шәрехли Росреестрның Татарстан Республикасы буенча идарәсе җитәкчесе урынбасары Лилия Борһанова. - Әгәр узган ел белән агымдагы ел күрсәткечләрен күчемсез милекнең башка төрләренә чагыштырсак, без барлык объектлар буенча да арта баруны күрәбез. Әйтик, фатирларга ипотека саны – 17% ка, торак булмаган биналарга-18% ка, машина урынына – 37% ка арткан. Агымдагы елның гыйнвар аенда безнең мәгълүматлар буенча барлыгы 7,3 меңнән артык ипотека теркәлгән, бу узган ел белән чагыштырганда 12% ка күбрәк».
Лилия Борһанова билгеләп үткәнчә, элеккечә үк ташламалы кредит бирү программасы татарстанлыларның активлыгына уңай роль уйный. Гыйнвар аенда Татарстан Росреестры тарафыннан 500 дән артык ташламалы ипотека теркәлгән инде, тулаем алганда, аның гамәлдә булган чорында (2020 елның маеннан) ведомство тарафыннан 15 меңгә якын ташламалы ипотека теркәлгән.
Моннан тыш, «24 сәгать эчендә ипотека» да үсеш ала, ул Татарстанда 2021 елның сентябреннән гамәлгә ашырыла. Узган ел әлеге проект гамәлдә булган чорда Татарстан Росреестрына бер көндә ипотека алуга 8,6 меңнән артык гариза кергән, гыйнвар аенда-якынча 1,2 мең кеше теркәлгән.
Татарстан Республикасы риелторлар гильдиясе вице-президенты Руслан Садриев фикеренчә, шәһәр читендәге торак белән кызыксыну, барыннан да элек, пандемия һәм аның белән бәйле чикләүләр, шулай ук фатирларның бәясен арттыру белән бәйле.:
«Шәһәр фатирын сатып, гаилә кечкенә генә йорт сатып ала. Бүген төрле бәя категорияләрендә тәкъдимнәр җитәрлек, шул исәптән Казан читендә дә. Тагын бер үсеш драйверы булып юридик заттан яки шәхси эшмәкәрдән ташламалы ипотека буенча йорт сатып алу яки төзергә мөмкинлек тора. Бу очракта еллык база процент ставкасы 6% тан кимрәк тәшкил итә. Шулай ук балалы гаиләләргә ташламалы кредит бирү программалары да гамәлдә".