Җир-хокук саклаучыларга. Менделеевск районы җитәкчесе Радмир Беляев Фәрит Мөхәммәтшиннан полиция хезмәткәрләренә җир кишәрлекләрен бушлай бирү мөмкинлеге турында сорау белән чыкты

Радмир Беляев Татарстан парламенты башлыгына «Җир кишәрлекләрен эчке эшләр хезмәткәрләренә бушлай файдалануга бирүне закон дәрәҗәсендә карарга кирәк"- дип мөрәҗәгать итте. Район җитәкчесе сүзләренә караганда, мондый чара район эчке эшләр бүлекләрендә кадрлар мәсьәләсен хәл итүдә ярдәм итә алыр иде.

Районда кадрлар җитмәү  30% тәшкил итә. Шул ук вакытта, торак төзелеше темплары югары. Быел гына да 13 мең кв.м.файдалануга тапшырырга планлаштыралар. Моннан тыш, Кама елгасы янында газ торбасын күчерү килешенгән,  ә бу исә  коттедж бистәләре өчен яңа мәйданчыклар ачарга мөмкинлек бирәчәк. Шәхси торак төзелеше төзелешенә өстәмә җир кишәрлекләре бүлеп бирү хокук саклау органнары өчен район үсешендә өстәмә стимул булачак.