Татарстанда төзелеш өчен яңа җирләр ачыкланды
2022 ел башыннан Татарстанда торак төзелеше өчен яраклы җир участокларының саны 17 дән 30 га кадәр артты. Аларның гомуми мәйданы - йөз гектардан артык. Бу хакта торак төзелешенә җәлеп итү максатында җир кишәрлекләреннән файдалануның нәтиҗәлелеген анализлап, Татарстан Росреестры хәбәр итә.
30 җир кишәрлегенең 29 ы - шәхси торак төзелеше, 1се - күпфатирлы йорт. Җир участокларының күпчелек өлеше (20) Питрәч районында урнашкан. Шулай ук Зеленодольск, Нурлат, Аксубай, Актаныш, Югары Ослан, Кукмара районнарында һәм Түбән Кама шәһәрендә дә участоклар бар. Ачыкланган җир участоклары турында мәгълүмат ачык кадастр картасы сервисында урнаштырылган.
Татарстан Республикасы буенча Росреестр идарәсе җитәкчесе Азат Җаббаров сөйләгәнчә, ведомство башкарма хакимият органнары белән берлектә җир участокларыннан файдалануның нәтиҗәлелеген анализлый. Моның өчен Татарстан Республикасы торак пунктларының һәм торак төзелеше өчен әйләнешкә кертелергә мөмкин булган җир кишәрлекләренең исемлеген төзү буенча эш башкаручы оператив штаб төзелде.
- Мәгълүмат чыганагы сыйфатында шулай ук «Торак-коммуналь хуҗалыкны үзгәртеп кору» автоматлаштырылган мәгълүмат системасы да кулланыла. Комплекслы үсеш проектларына анализ авария хәлендәге техник торышлы капиталь төзелеш объектлары урнашкан территорияләрне ачыкларга ярдәм итә. Әлеге территорияләр торак төзелеше максатларында әйләнешкә кертү мөмкинлеге булган җир кишәрлекләре исемлегенә кертү өчен потенциаль булып тора, - дип билгеләде Азат Җаббаров.
Җир участогын ничек сайларга
Торак төзелеше өчен әйләнешкә җәлеп итү потенциалы булган җир кишәрлекләрен һәм территорияләрне эзләү өчен ачык кадастр картасы сайтына керергә, "Участок" - "Торак төзелеше" вкладкасын сайларга һәм эзләү юлына регион номерын, ике нокта һәм йолдызны ара калдырмыйча кертергә кирәк. Мәсәлән, Татарстанда бу 16:* Торак төзелеше өчен әйләнешкә җәлеп итү потенциалы булган җир кишәрлеге яки территория белән бәйле мөрәҗәгать булдыру өчен тиешле объект буенча мәгълүмат тәрәзәсендә “Мөрәҗәгатьне бирергә” дигән сылтамага басарга кирәк.