Торак шартларын яхшырту өчен ана капиталы акчаларын ничек кулланырга мөмкин
Ана капиталы программасы 2007 елдан 2026 елга кадәр икенче бала (яки өченче бала яки аннан соңгы балалар) туганда, яисә, әгәр икенче бала туганда (уллыкка алынганда) бу акчаларны алу хокукы рәсмиләштерелмәгән булса) йә 2020 елның 1 гыйнварыннан беренче бала туган (уллыкка алынган) очракта, гамәлдә була.
Ана (гаилә) капиталы алу хокукына түбәндәгеләр ия:
Россия гражданлыгы булган әни;
әгәр ул беренче, икенче, өченче яисә аннан соңгы баланы уллыкка алучы бердәнбер кеше булса, Россия гражданлыгы булган әти;
әти, әнисенең ана капиталын алу хокукы туктатылган очракта, аның Россия Федерациясе гражданлыгы булуга бәйсез рәвештә;
балигъ булмаган бала (тигез өлешләрдә балалар), тиешле белем бирү хезмәтләрен күрсәтүгә хокукы булган оешмада белем алучы балигъ яшьтәге бала уку тәмамланганчы, әмма ата-аналарында яисә бердәнбер ата-анасында (уллыкка алучыларында яисә бердәнбер уллыкка алучысында) дәүләт ярдәменең өстәмә чараларына хокук туктатылса, аларга 23 яшь тулганчы
Ана капиталына сертификат алу өчен Россия Пенсия фондына яисә яшәү урынына бәйсез рәвештә КФҮкә мөрәҗәгать итәргә мөмкин.
Сертификат бирү турында гаризаны мөстәкыйль рәвештә дә, ышанычлы зат аша да бирергә, почта аша яисә Дәүләт хезмәтләре порталында шәхси кабинет аша да җибәрергә мөмкин, бала туганнан яисә уллыкка алынганнан соң ук, шулай ук соңрак, гаилә өчен теләсә нинди уңайлы чорда. Пенсия фонды тарафыннан ана капиталын бирү турында уңай карар чыгарылганнан соң, сертификат автомат рәвештә формалаша һәм Дәүләт хезмәтләре порталында шәхси кабинетка җибәрелә.
Ана капиталы акчаларын балаларга белем бирүгә, айлык түләүләр алуга (әгәр гаиләнең кереме яшәү минимумыннан түбәнрәк булса), инвалид балаларга ярдәм күрсәтүгә яки әнисенең пенсиясенең тупланма өлешен формалаштыруга юнәлдерергә мөмкин.
Хезмәт министрлыгы мәгълүматлары буенча, сертификатны файдалануның иң популяр ысулларының берсе - торак шартларын яхшырту: йорт, фатирлар төзү һәм сатып алу һәм ипотека түләве.
Ана капиталы белән торак шартларын яхшыртуга ярдәм итү баланың тууына (уллыкка алынуына) бәйле рәвештә дәүләт ярдәменең өстәмә чараларына хокукы барлыкка килгән балага өч ел тулгач кына мөмкин. Искәрмә - торак кредиты яки заем буенча беренче кертемне түләү, шулай ук ана капиталы акчаларын торак кредитларын һәм заемнарын каплауга җибәрү.
Бу очракта ана капиталыннан баланың тууына (уллыкка алынуына) бәйле рәвештә дәүләт ярдәменең өстәмә чараларына хокукы барлыкка килгән бала туганнан соң ук файдаланырга мөмкин. Ана капиталын файдалануның иң популяр юнәлешләрен җентекләбрәк карыйк.
Мөслим районында яшәүчеләр арасында иң еш кулланыла торган юнәлеш торак һәм ипотека. Ана капиталы акчаларын фатир сатып алганда яки ипотека өчен кулланырга мөмкин. Гадәттә, сертификатны торак кредитының төп бурычын каплауга яки беренчел кертемгә җибәрә.
Моннан тыш, ана капиталын ташламалы программаларда - Ерак Көнчыгыш, авыл, гаилә, хәрби ипотекаларда да кулланырга мөмкин.
Шулай ук ана капиталы акчаларын бакча участогында торак йортны реконструкцияләүгә җибәрергә яки аны төзүгә киткән чыгымнарны компенсацияләргә мөмкин.