Светофор – безнең иң яхшы дустыбыз
5 август - светофорның туган көне. Бу бәйрәм - балаларның игътибарын юл хәрәкәте кагыйдәләренә җәлеп итү өчен менә дигән мөмкинлек.
Ижевканың «Кояшкай» балалар бакчасында тәрбияләнүчеләр өчен «Светофор - иң яхшы дус»дип исемләнгән тематик сәгать узды. Балалар беренче светофорның кайчан барлыкка килүен һәм светофорның нинди төрләре булуын белделәр. Балалар кечкенә Светофор турында сөйләгәнне игътибар белән тыңладылар, «Иң җитез», «Рөхсәт ителә – тыела», «Кем тизрәк барып җитә» дигән күңелле конкурсларда катнаштылар. Туган көн кебек үк, светофор өчен «Түгәрәк ипи» җырладылар, ә Светофор, үз чиратында, барлык балаларны да татлы ризыклар белән сыйлады. Светофор ролендә булачак беренче сыйныф укучысы Миңнеханова Карина чыгыш ясады. Тәрбияләнүчеләр көнне файдалы итеп үткәрделәр, бик күп уңай эмоцияләр һәм яхшы кәеф алдылар.