2024 елга социаль фонд бюджеты Хөкүмәт тарафыннан Дәүләт Думасына кертелгән.

Гомумән алганда, социаль фонд пенсияләр, иминият пособиеләре түләүгә һәм социаль ярдәм чаралары күрсәтүгә 16 трлн сумнан артык акча җибәрәчәк.

2024 елның 1 гыйнварыннан эшләмәүче пенсионерлар өчен иминият пенсияләрен индексацияләү 7,5% тәшкил итәчәк. 2024 елның 1 гыйнварыннан яңадан исәпләү нәтиҗәсендә эшләмәүчеләрнең картлык буенча иминият пенсиясенең уртача күләме 1 628 сумга артачак һәм 23 405 сум тәшкил итәчәк. 2024 елда пенсия түләүләренә барлыгы 10 трлн сумнан артык акча юнәлдереләчәк.

2024 елда вакытлыча эшкә яраксызлык буенча пособиенең максималь суммасы 2023 елдагы 83 мең сум урынына аена 122 мең сумнан артык тәшкил итәчәк. Йөклелек һәм бала табу буенча пособиенең максималь күләме 383 мең сумнан 565 мең сумга кадәр артачак. 1,5 яшькә кадәрге баланы карау буенча түләүләрнең максималь күләме 2023 елдгы 33,2 мең сум урынына айга 49 мең сум тәшкил итәчәк. Гомумән алганда, 2024 елда хастаханәләргә, йөклелек һәм бала табу һәм бала карау буенча пособиеләр түләүгә 1,2 трлн сумга якын акча салынган.

Балалы гаиләләргә социаль ярдәм күрсәтү өчен социаль фонд бюджетында 2,2 трлн сумнан артык акча каралган - бу акчалар бердәм пособие, ана капиталы, бала туганда бер тапкыр бирелә торган пособие һәм башка социаль ярдәм чараларына юнәлдереләчәк.

Бюджет проектында 1 февральдән ана капиталын чын инфляция дәрәҗәсе буенча индексацияләү каралган. Шулай ук 1 февральдән, фаразланган инфляция дәрәҗәсе буенча, социаль түләүләр дә индексацияләнәчәк: бу инвалидларга, ветераннарга айлык акчалата түләүләр, радиациядән зыян күргәннәргә пособиеләр һәм башка ярдәм чаралары.

2024 елдан җитештерү травматизмын һәм һөнәри авыруларны киметү буенча кисәтү чараларын финанслау артачак - 2024 елда ул 28,7 млрд сум тәшкил итәчәк. Җитештерүдә бәхетсезлек очракларыннан һәм һөнәри авырулардан иминиятләштерү буенча социаль фонд 162 млрд сумга якын акча җибәрәчәк: бу җитештерүдә зыян күрүчеләргә түләүләр, кисәтү чаралары, җитештерүдә зыян күрүчеләрне медицина, социаль һәм һөнәри реабилитацияләү. Моннан тыш, фонд бюджетында техник тернәкләндерү чаралары һәм башка ярдәм чаралары күрсәтүгә акча салынган.