Татарстан Республикасында «Кышкы каникуллар» профилактика чарасы старт ала
2023 елның 20 декабреннән 2024 елның 8 гыйнварына кадәр Татарстан Республикасы территориясендә балалар юл-транспорт һәлакәтен профилактикалауга юнәлдерелгән киң масштаблы "Кышкы каникуллар" чарасы узачак.
2023 елның 11 аенда республика юлларында 418 юл-транспорт һәлакәте теркәлгән, аларда 16 бала һәлак булган һәм 437се яраланган.
Балаларны транспорт чараларында йөрткәндә аварияләр белән бәйле хәл аеруча борчу тудыра. 11 ай нәтиҗәләре буенча республика юлларында 11 бала-пассажир һәлак булды.
Юл хәрәкәтендә катнашучыларның әлеге категориясе белән хәл кискенләшү сәбәпле, балаларның күпләп йөрү урыннарында балаларны йөртү кагыйдәләрен бозуны профилактикалау буенча чаралар узачак.
Дәүләт автоинспекциясе хезмәткәрләре һәм юл хәрәкәте кагыйдәләрен санга сукмаган кечкенә җәяүлеләр игътибарсыз калмаячак. Аларның юл аша чыгу кагыйдәләрен бозу фактларын полиция хезмәткәрләре, яшь хәрәкәт инспекторлары отрядлары, педагоглар, ата-аналар комитетлары, «ата-аналар патруле» һәм «әтиләр патруле» гражданнарның инициатив төркемнәре, шулай ук «Россия укучылар хәрәкәте» иҗтимагый оешмасы белән берлектә кисәтәчәк. Хокук бозулар турында мәгълүмат җәяүлеләрнең уку урыны буенча алар белән алга таба профилактик эшләү өчен тапшырылачак.
Шулай ук мәгариф оешмаларында полиция хезмәткәрләре укучылар һәм аларның әти-әниләре белән профилактик әңгәмәләр үткәрәчәк. Тематик лекцияләр автотранспорт предприятиеләрендә һәм башка оешмаларда узачак.
Көннең кыскаруы шартларында, шулай ук уңайсыз һава торышы күренешләре аркасында килеп чыккан юл хәлләре белән бәйле рәвештә, Татарстан Республикасы буенча Эчке эшләр министрлыгының Дәүләт автоинспекциясе юл хәрәкәтендә катнашучыларны игътибарлы, сак булырга һәм яктылыкны кире кайтаручы элементлардан файдаланырга чакыра.