2024 елда татарстанлылар картлык буенча пенсияне гариза бирмичә рәсмиләштерә ала
Мондый форматта иминият пенсиясен билгеләү өчен гражданның шәхси счетында хезмәт эшчәнлегенең барлык чорлары, эш бирүче түләгән иминият взнослары, стаж һәм булачак пенсиянең күләме турыдан-туры бәйле булган шәхси пенсия коэффициентлары турында мәгълүмат булу мөһим.
Үзенең хезмәт эшчәнлеге турында мәгълүматның тулылыгын дәүләт хезмәтләреннән яки Россия Социаль фондының клиент хезмәтеннән аерым шәхси счетның торышы турында күчермәгә заказ биреп тикшерергә мөмкин.
Әгәр эш турында мәгълүмат тулы булмаса, аерым шәхси счетка төзәтмәләр кертү турында гариза бирергә мөмкин, бу вакыт эчендә стажны һәм хезмәт хакын раслаучы документлар бирелә. Барысы да дөрес булса, пенсия өстәмә документларсыз исәпләнә ала.
"Әгәр шәхси счетта барлык кирәкле мәгълүматлар булса, ә граждан пенсияне автомат режимда билгеләүгә ризалык бирсә, картлык буенча иминият пенсиясен билгеләү турындагы карар пенсия билгеләү турындагы гариза теркәлгәннән соң өч сәгать эчендә формалаштырылачак, шуннан соң гражданның шәхси кабинетына дәүләт хезмәтләре порталында тиешле хәбәр киләчәк», — дип билгеләп үтте Татарстан Республикасы буенча Россия Социаль фонды бүлеге идарәчесе Эдуард Вафин.
Исегезгә төшерәбез, 2024 елда картлык буенча иминият пенсиясе 58 яшькә җиткән хатын - кызларга һәм 63 яшьтәге ир-атларга, 15 еллык иминият стажы һәм 28,2 пенсия коэффициенты булганда билгеләнә.