Татарстан почтасы хезмәткәрләре Самараның махсуслаштырылган югары уку йортында һөнәри компетенцияләрен күтәрәчәк
Россия почтасы хезмәткәрләренең квалификациясен күтәрү һәм яңадан әзерләү программасы старт алды.
«Почта элемтәсе хезмәткәре» квалификация күтәрү программасы буенча уку Самарада Идел буе дәүләт телекоммуникация һәм информатика университетында (ПГУТИ) узачак.
Укулар Татарстаннан гына түгел, Самара, Пенза, Саратов, Түбән Новгород, Оренбург, Ульяновск өлкәләреннән, шулай ук Башкортостан, Мордовия, Марий Эл һәм Чуаш республикаларыннан да почта хезмәткәрләре узачак. Алар почта бүлекчәләренең эшен оештыру һәм тикшерүдә тоту, персоналга җитәкчелек итү өлкәсендә заманча алымнарны үзләштерәчәкләр, актуаль һөнәри темалар буенча белем алачаклар һәм хезмәт күрсәтү күнекмәләрен арттыруга юнәлдерелгән тренингларда катнашачаклар. Моннан тыш, почта бүлеге башлыгы һәм башлык урынбасары позицияләрендә һөнәри эшчәнлек өчен кирәкле компетенцияләрне камилләштерәләр. Укыту көндезге һәм дистанцион форматларда уза.
"Дәресләр Идел буе дәүләт телекоммуникация һәм информатика университетында очраклы гына узмый, биредә Россиядә беренче почта кафедрасы эшли бит. Мондый хезмәттәшлек компаниянең стратегик траекторияләрен гамәлгә ашыруга ярдәм итә торган инновацион белем бирү мәйданчыгын төзергә мөмкинлек бирә. Хезмәткәрләргә цифрлы технологияләр, процессларны автоматлаштыру инструментлары, интеллектуаль мәгълүмат системаларын төзү, «акыллы» сервислар куллану, җитештерү һәм логистика комплекслары белән идарә итү технологияләре, клиент тәҗрибәсен формалаштыру һәм идарә итү технологияләре өлкәләрендә белем һәм күнекмәләр таләп ителә», — дип билгеләде Россия Почтасының Идел макротөбәге директоры Андрей Попов.