Менделеевскида районның авыл хуҗалыгы җитештерүе алдынгыларын котладылар
Тантаналы бәйрәм чарасы С.Гассар исемендәге мәдәният йортында узды.
Кунакларны һөнәри бәйрәмнәре белән район башлыгы Радмир Беляев, «Татагрохим» ААҖ генераль директоры Наил Гобәйдуллин һәм авыл хуҗалыгы һәм азык-төлек идарәсе җитәкчесе Илнур Фәрухшин котладылар.
"Авыл хуҗалыгыннан башка яшәргә ярамый. Без гаять зур илебезнең азык-төлек запасын тәэмин итәргә тиеш. Авыр вакытларга карамастан, без аягыбызда нык басып торабыз", - диде Радмир Илдар улы.
Бәйрәмдә ветераннар һәм авыл хуҗалыгы хезмәткәрләре, авыл җирлекләре башлыклары катнашты. Кунаклар өчен шәһәрнең иҗат коллективлары чыгыш ясады.
Бүләкләү тантаналы шартларда узды.
Татарстан Республикасы Авыл хуҗалыгы һәм азык-төлек министрлыгының, Татарстан Республикасы агросәнәгать комплексы ветераннары Советының Рәхмәт хаты, «Татарстан Республикасы агросәнәгать комплексының мактаулы ветераны» истәлекле медале белән Нәбиуллин Габделхәй бүләкләнде.
Шулай ук күпьеллык нәтиҗәле хезмәтләре һәм районның агросәнәгать комплексын үстерүгә керткән шәхси өлешләре өчен Татарстан Республикасы Авыл хуҗалыгы һәм азык-төлек министрлыгы һәм район башлыгы ведомство бүләкләре белән алдынгы авыл хуҗалыгы хезмәткәрләре бүләкләнде.
Әйтергә кирәк, безнең районда 4000нән артык шәхси (ярдәмче) хуҗалык эшли. Шулай ук 56 крестьян-фермер хуҗалыгы эшли, 7 юридик зат авыл хуҗалыгы җитештерүе белән шөгыльләнә, шулай ук 11 мини-ферма эшли.