Әлфия Когогина: кече инновацион компанияләр кече һәм урта эшмәкәрлеккә тиешле барлык ташламаларны алырга тиеш
Дәүләт Думасы инновацион фәнни-технологик үзәкләрдә катнашучыларны кече һәм урта эшмәкәрлек субъектларының Бердәм реестрына кертү тәртибен ачыклаучы закон проектын беренче укылышта кабул итте.
РФ Дәүләт Думасы депутаты, кече һәм урта эшмәкәрлек буенча комитет рәисенең беренче урынбасары, «Бердәм Россия» партиясенең «Эшмәкәрлек» федераль проекты координаторы, закон проекты авторларының берсе Әлфия Когогина болай дип шәрехләде: «Вячеслав Викторович кушуы буенча кече бизнесны үстерүгә кагылышлы барлык закон проектлары төбәкләр һәм эшмәкәрлек җәмәгатьчелеге белән фикер алыша. Алай гына да түгел, аларның күбесе урыннарда туа. Бу закон проекты белән дә шулай булды. Моннан беркадәр вакыт элек Рязаньда кече һәм урта эшмәкәрлек комитетының күчмә утырышы барышында без «Аэрокосмик инновацион Үзән» инновацион фәнни-технологик үзәгендә булдык, анда 103 катнашучы резидент булып тора. Бу катнашучылар саны буенча Мәскәү Дәүләт университетыннан соң икенче инновацион фәнни-технологик үзәк".
"Шулай ук кече һәм урта эшмәкәрлек субъектлары булган инновацион фәнни-технологик үзәк катнашучылары, алар табышка салым буенча салым хисабын тапшырмау хокукыннан файдаланганда, кече һәм урта эшмәкәрлек субъектлары реестрыннан төшереп калдырылуларына игътибар иттеләр. Шуның нәтиҗәсендә алар кече һәм урта эшмәкәрлек субъектларының дәүләт сатып алуларында тәэмин итүчеләр сыйфатында катнашу квотасыннан, шулай ук хисаплылык, салым исәбен алып бару һәм статистик хисапны гадиләштерелгән тәртиптә тапшыру хокукыннан мәхрүм ителәләр. Болар барысы да югары технологияле компанияләр өчен өстәмә йөкләнешкә китерә " - дип өстәде Когогина.
Закон проектында кече һәм урта эшмәкәрлек субъектларының Бердәм реестрына инновацион фәнни-технологик үзәк проектында катнашучыларны кертү тәртибен төгәлләштерү өлешендә кече һәм урта эшмәкәрлек үсеше турында Федераль законга үзгәрешләр кертү карала. Россия икътисади үсеш министрлыгы Россия Федераль салым хезмәтенә инновацион фәнни-технологик үзәкнең идарәче компанияләре турында мәгълүмат тапшырачак, ә инновацион фәнни-технологик үзәкнең идарәче компанияләре Россия Федераль салым хезмәтенә үз катнашучылары турында мәгълүмат тапшырачак.
Моннан тыш, инновацион фәнни-технологик үзәкнең хокукый режимы үзенең табигате буенча «Сколково» резидентлары өчен режим белән охшаш булганга күрә, бердәнбер критерий – кече һәм урта эшмәкәрлек субъекты төре билгеләнәчәк нигез-уртача исемлек саны булачак.