Гражданнарны кабул итү
Менделеевскида район башлыгы Роберт Искәндәров рәислегендә гадәттәгечә гражданнарны кабул итү булды.
Бу атнадагы сорауларның күбесе социаль өлкәгә кагылды.
Менделеевскида яшәүче хатын-кыз гемодиализга юл өчен компенсацияне арттыру мәсьәләсен куйды. Социаль яклау бүлеге ТР транспорт министрлыгыннан, хастаханәгә кадәр араны исәпкә алып, Алабуга шәһәренә кадәр чакрымны яңадан санауны кабат сораячак, дип карар кылдылар.
Тагын бер мөрәҗәгать чернобыльчеләр өчен торак-коммуналь хезмәтләр турында ташламалар исәпләү тәртибенә кагылды. Гариза бирүченең ире Луганск Халык Республикасында теркәлгән. Исәпләүләр өчен нәрсәләр кирәклеген аңлаттылар.
Оныгына, ятим балага һәм II группа инвалидка торак бирү мәсьәләсе белән аның әбисе килде. Хәзер ул төзелә торган яңа йортта торак алу исемлегендә тора. Гаиләгә бу мәсьәлә буенча язма гариза бирергә киңәш иттеләр.
Тагын бер мәсьәлә 1 нче ашханәдә су һәм җылылык белән тәэмин итүгә кагылды. Сыйфатлы артезиан суы алу өчен 100 метрдан да ким булмаган тирәнлектәге скважина бораулау тәкъдим ителде. Газга тоташу өчен «Алабугагаз» эксплуатация җитештерү идарәсенә техник кушылуга гариза бирергә кирәк.