Көн артыннан көн

4 нче мәктәп һәм гимназия яны лагерьларында ял итүчеләр Гражданнар сугышында катнашканнарны искә алдылар. 
Ел саен «Карповчы» ТИСендә Гөлсинә Заһретдинова җитәкчелегендә буыннар очрашулары, экскурсияләр, «Нефть баклары» мемориал комплекс-каберлеген чистарту оештырыла. 
– Сез Бөек Ватан сугышы турында беләсез, ә Гражданнар сугышы күпләр өчен таныш түгел, – дип мөрәҗәгать итте башкарма комитет җитәкчесе урынбасары Айдар Сәфәргалин. – Шәһәрдә ул турыда искәртеп торучы урын бар. 
Каберлекләр барлыкка килү тарихы белән туган якны өйрәнү музееның фәнни хезмәткәре Ольга Боднарь таныштырды, аннан соң балалар кызылгвардиячеләр һәйкәленә чәчәкләр куйдылар. 
Белешмә: «Нефть баклары» каберлеге – Совет власте өчен көрәшүчеләр күмелгән урын. Исеме химия заводына караган нефть бакларының якын урнашуы белән бәйле.