Әлфия Когогина: укучыларны кайнар аш белән тәэмин итү турында закон проектында икенче укылышка федераль бюджеттан төбәкләргә субсидияләр исәпкә алынды

Дәүләт Думасының Мәгариф һәм фән комитеты кече яшьтәге мәктәп укучылары өчен кайнар ризык турында закон проектын икенче укылышта кабул итәргә тәкъдим итте һәм якын арада Дәүләт Думасы каравына кертеләчәк.

Дәүләт Думасы депутаты, Икътисадый сәясәт, сәнәгать, инновацион үсеш һәм эшкуарлык комитеты рәисе урынбасары Әлфия Когогина шәрехләде:

«Закон проектын беренче укылышта кабул иткәннән соң, төзәтмәләр өстендә эш барышында кергән тәкъдимнәрне исәпкә алып, закон проекты текстында икенче укылышка федераль бюджеттан төбәкләргә башлангыч сыйныф укучыларын кайнар ризык белән тәэмин итү өчен субсидияләр исәпкә алынды».

Закон проекты «сәламәт туклану», «балаларны туклану өчен азык-төлек продукциясе», «азык-төлек продукциясе сыйфаты» төшенчәләрен, сыйфатсыз, куллануга яраксыз, фальсификацияләнгән продукцияне куллануны тыюны билгели. Документта җитештерүчеләрнең кулланучыларга азык-төлек продуктларының сыйфаты һәм куркынычсызлыгы турында тулы һәм дөрес мәгълүмат бирү бурычы беркетелгән.

Закон проекты РФ Президентының юлламасын тормышка ашыруга юнәлдерелгән. Яңа редакция нигезендә, кирәкле шартлар тудыру һәм матди-техник базаны әзерләү, башлангыч гомуми белем бирү программалары буенча барлык укучыларны кайнар аш белән тәэмин итү чаралары 2023 елның 1 сентябренә кадәр Россия Федерациясе Хөкүмәте билгеләгән срокларда этаплап тәмамланырга тиеш.