Менделеевск районында Талантлар йолдызлыгы утыртылды
«Созвездие–Йолдызлык» эстрада сәнгатенең республика телевизион яшьләр фестивале лауреатлары һәм призерлары катнашында концерт Бәзәкә мәдәният йортында узды.
Вокалчылар һәм хореографлар аларның ни дәрәҗәдә талантлы булуларын күрсәттеләр.
Шунысы куанычлы, катнашучылар арасында безнең районнан да талантлар бар иде. Алар төрле елларда фестивальнең гала-концертларында чыгыш ясадылар, призлы урыннар яуладылар. Мәсәлән, «Кристалл» ансамбленең фестивальнең Гран-прие бар, «Шаян» быел беренче урынны алды. Алар үзләренең дәртле композицияләрен башкардылар.
Тамашачылар шулай ук Бондюг йолдызлары Софья Миңнебаева, Шамил Шәймәрданов, Арина Ястребова, Яна Шалаумованы көчле алкышладылар.
«Бүген залда гаҗәеп атмосфера хөкем сөрде,-дип билгеләп үтте «Созвездие-Йолдызлык» республика фестиваль хәрәкәтенең генераль продюсеры Дмитрий Туманов. - Сезнең өчен чыгыш ясау бик рәхәт булды».
Катнашучыларны район башкарма комитеты җитәкчесенең социаль мәсьәләләр буенча урынбасары Айдар Сәфәргалин җылы котлады.
