Район авыл җирлекләрендә Җиңү көненә багышланган тантаналы митинглар уза

Иске Гришкин авыл җирлегендә Бөек Җиңүнең 77 еллыгына багышланган тантаналы митинглар узды.

Чара Карманково һәм Иске Гришкино авылларында узды.

Авыл халкын һәм кунакларны якынлашып килүче бәйрәм белән район башлыгы урынбасары Ләйсән Галеева һәм Иске Гришкин авыл җирлеге башлыгы Валентина Мамакова котладылар, сәламәтлек, бәхет, иминлек һәм аяз күк йөзе теләделәр.

Митингта билгеләп үтелгәнчә, Иске Гришкин авыл җирлегеннән фронтка 389 кеше киткән, шуларның 115е генә өйләренә кире әйләнеп кайткан. Бүген биредә 3 тыл хезмәтчәне һәм 17 сугыш чоры баласы яши.

Һәлак булганнарны бер минут тынлык белән искә алдылар.

Шулай ук тыл хезмәтчәннәренә һәм сугыш чоры балаларына открыткалар һәм истәлекле бүләкләр тапшырылды.

Митинглар һәйкәлләргә чәчәкләр салу белән тәмамланды.

Шулай ук Иске Гришкин авылында Үлемсез полк узды, анда балалар да, өлкәннәр дә катнашты.

Чаралар авыл мәдәният йорты янында солдат боткасы һәм бәйрәм концерты белән дәвам итте.

Моннан тыш, район җитәкчелеге халык белән бергә кызылармияче Григорий Николаев каберенә һәм гражданнар сугышы вакытында һәлак булганнар һәйкәленә чәчәкләр салдылар.