Әлфия Когогина: балаларны тәмәке һәм электрон сигарет тартуга җәлеп иткән өчен җаваплылык көчәйтеләчәк
Дәүләт Думасы балигъ булмаганнарны тәмәке һәмэлектрон сигарет тартуга җәлеп итү өчен административ җаваплылыкны көчәйтүче закон кабул итте.
РФ Дәүләт Думасы депутаты, кече һәм урта эшмәкәрлек комитеты рәисенең беренче урынбасары Әлфия Когогина болай дип аңлатты: «Берьюлы ике укылышта, балигъ булмаганнарга электрон сигарет сатуны тыю турындагы закон кабул ителгәннән соң бер көн үткәч, без балигъ булмаганнарны тәмәке тартуга һәм электрон сигаретлар тартуга җәлеп итүгә җаваплылыкны арттыру турында төзәтмәләр кабул иттек. Сүз балаларыбызның сәламәтлеге һәм милләтнең киләчәге турында бара, шуңа күрә бу мәсьәләдә депутатлар бертавыштан һәм оператив рәвештә эшләделәр».
Балигъ булмаган баланы никотинлы продукция, кальян һ. б. тартуга җәлеп иткән өчен штраф билгеләнә.:
- гражданнар өчен 2-5 мең сум (хәзер 1-2 мең);
- ата-аналар яки законлы вәкилләр өчен 5-7 мең сум (хәзер 2-3 мең сум).
Шулай ук балигъ булмаганнарга мондый продукция һәм тиешле җайланмалар саткан өчен штрафлар артачак: гражданнар өчен штраф 40-60 мең сум (хәзер 20-40 мең), вазифаи затлар өчен — 150-300 мең (хәзер 40-70 мең), юридик затлар өчен — 400-600 мең (хәзер 150-300 мең) тәшкил итәчәк.