Әлфия Когогина: төбәкләрнең сәнәгать паркларын булдыру чыгымнарының 99% федераль бюджеттан капланачак
Дәүләт Думасы депутаты, кече һәм урта эшкуарлык комитеты рәисенең беренче урынбасары Әлфия Когогина болай дип аңлатма бирде: «"Эшкуарлык" федераль партия проекты кысаларында без проблемаларны анализлау һәм сәнәгать һәм технологик кече һәм урта эшмәкәрлекне үстерү өчен чишелешләр эзләү буенча зур эш башкардык. Мониторинг барышында резидентлар мәйданнар җитмәүне сәнәгать парклары үсешенең төп проблемаларының берсе дип атады, һәм федераль дәрәҗәдә кабул ителгән карар бу мәсьәләдә ярдәм күрсәтәчәк.
Федераль бюджеттан субсидия күләме РФ субъектының тиешле чыгымнарының 99 процентын тәшкил итәчәк. Барлык төр технопаркларның, шул исәптән югары технологияләр өлкәсендәге идарәче компанияләре дә финанслауны ала алачак. Бу кагыйдәләр гамәлдәге предприятиеләрне модернизацияләү һәм реконструкцияләү буенча проектларга да кагыла. Мондый дәүләт ярдәме социаль-икътисади күрсәткечләре түбән булган төбәкләрдә генә түгел, ә моношәһәрләрдә, шулай ук яңа территорияләрдә дә булачак.
"Сәнәгать паркларына ярдәм күрсәтү турындагы тәкъдимнәр Татарстан Республикасы Рәисе Рөстәм Нургали улы Миңнеханов катнашында Казанда уздырылган Дәүләт Думасының кече һәм урта эшкуарлык комитетының күчмә утырышы барышында яңгырады», – дип билгеләп үтте Когогина.