Әлфия Когогина: Безнең эш өстенлекләре - балаларга сыйфатлы, куркынычсыз ял итү мөмкинлеген булдыру
Россия Федерациясе Дәүләт Думасы депутаты Әлфия Когогина төбәк атнасы барышында Татарстан Республикасының сәламәтләндерү лагерьларында балалар ялын оештыру шартлары белән танышты.
"Безнең эш өстенлекләре - балаларга сыйфатлы, куркынычсыз ял итү мөмкинлеген булдыру. Бу төбәк атнасында Парламент контроле кысаларында сезонга әзерлек белән танышу өчен үз округымның балалар лагерьларына барам", - дип шәрехләде депутат.
"Җәйге сәламәтләндерү кампаниясен контрольдә тотуны ел саен һәм даими алып барачакбыз. Исегезгә төшерәм, узган ел нәтиҗәләре буенча безнең тарафтан Дәүләт Думасы карары кабул ителде, анда хөкүмәт алдында беренче чираттагы бурычлар билгеләнде. Тәкъдимнәрнең яртысы үтәлгән, әмма юлламаларның үтемлелеге, лагерьларның матди базасының искерүе мәсьәләләре кала. Киләсе атнада Дәүләт Думасына РФ Хөкүмәте вәкилләре вәзгыять, билгеләнгән мәсьәләләрне хәл итү буенча гамәлгә ашырыла торган чаралар турында чыгыш белән чакырылды», – дип хәбәр итте Когогина.
Парламентарий сәламәтләндерү лагерьлары территориясен һәм корпусларын, ашханәләрне, медпунктларны, спорт мәйданчыкларын һәм башка объектларны карады, гамәлгә ашырыла торган белем бирү программалары белән танышты.
Гомумән алганда, Татарстанда быел бөтен республика буенча мең ярым оешмада 200 меңнән артык бала ял итәчәк. Социаль яктан якланмаган категорияләргә аерым игътибар биреләчәк — авыр тормыш хәлендә калган, махсус хәрби операциядә катнашкан гаиләләрдәге, инвалид һәм ата-ана каравыннан мәхрүм калган балаларга 50 меңнән артык түләүсез юллама биреләчәк.