Әлфия Когогина: энергетикларның рекламасы закон белән чикләнәчәк
Дәүләт Думасы икенче һәм өченче укылышта «Реклама турында» Федераль Законга алкогольсез тонусны күтәрүче эчемлекләр, шул исәптән энергетик эчемлекләр рекламасының үзенчәлекләрен билгеләү өлешендә үзгәрешләр кертү турында закон кабул итте.
РФ Дәүләт Думасы депутаты, «Бердәм Россия» партиясенең «Эшмәкәрлек» федераль проекты координаторы Әлфия Когогина болай дип шәрехләде: «Табиб-белгечләр энергетикларны куллану баланың сәламәтлегенә зыянлы йогынты ясый, йөрәк-кан тамырлары һәм нерв системалары белән бәйле проблемаларга, игътибарның таркаулыгына, шикәр чиренә китерә, дип белдерә. Бу хакта ата-аналар да сигнал бирә. Дәүләт Думасы һөнәри бергәлек белән бергә балаларны потенциаль куркынычлардан яклау инициативалары өстендә эзлекле эш алып бара. Исегезгә төшерәм, безнең тарафтан балаларга энергетик эчемлекләр сатуны тыючы федераль закон кабул ителде инде, аннары мондый намуссыз сатучыларның җаваплылыгы катгыйланды. Бүген без мондый эчемлекләр рекламасына чикләүләр кертәбез".
Документ нигезендә реклама һәр очракта тиешле эчемлекләрне артык куллануның зыяны турында кисәтү белән бергә барырга һәм балигъ булмаганнарга мөрәҗәгать итмәскә, шулай ук тонусны күтәрүче һәм энергетик эчемлекләрдә биологик актив өстәмәләр, витаминнар булу-булмавы турында мәгълүмат булырга тиеш.
Мондый кисәтүнең таралу вакыты билгеләнә. Радио рекламасында мондый кисәтү өч секундтан да ким булмаска тиеш, телевизор рекламасында — биш секундтан да ким булмаска тиеш, һәм мондый кисәтүгә кадр мәйданының 7% тан да ким булмаска тиеш, ә башка ысуллар белән таратыла торган рекламада — реклама мәйданының 7% тан да ким булмаска тиеш.
Күрсәтелгән таләпләрне бозган өчен реклама бирүче һәм реклама таратучы җаваплылык тотачак
Норма 2026 елның 1 мартыннан эшли башлаячак.