Әлфия Когогина: авылда дарулар алу мөмкинлеге арттырылырга тиеш
Дәүләт Думасы 2026 елның 1 июненнән күчмә даруханә пунктлары ярдәмендә медицинада кулланыла торган дару препаратларын ваклап сатуны гамәлгә ашыру буенча эксперимент үткәрүне күздә тоткан закон проектын беренче укылышта кабул итте.
РФ Дәүләт Думасы депутаты, «Бердәм Россия» партиясенең «Эшмәкәрлек» федераль проекты координаторы Әлфия Когогина: «Ерак авылларда дарулар алу мәсьәләсе берничә тапкыр күтәрелде, һәм тәкъдим ителгән карар – даруханәләрнең структур бүлекчәләре булган күчмә пунктлар булдыру мөмкинлеге – бу проблеманы хәл итүгә юнәлдерелгән. Стационар даруханәләр, фельдшер акушерлык пунктлары, хастаханәләр һәм башка альтернативалар булмаган торак пунктларда эшләү маршруты һәм графигы билгеләнәчәк. Барлык мәгълүмат маркировканың дәүләт мәгълүмати системасына тапшырылачак, бу стационар даруханәләр белән беррәттән күчмә пунктларда сатыла торган даруларның сыйфатын һәм куркынычсызлыгын тәэмин итәчәк».
Документта күчмә даруханә пунктлары ярдәмендә медицинада кулланыла торган дару препаратларын ваклап сату тәртибе беркетелә.
РФ субъектын экспериментка кертү һәм аннан чыгару РФ субъектының югары вазыйфаи заты үтенече нигезендә РФ Хөкүмәте карары буенча гамәлгә ашырылачак.
РФ Хөкүмәте эксперимент үткәрү тәртибе турында нигезләмәне раслаячак, ә Росздравнадзор аны үткәрү белән бәйле таләпләрнең үтәлешен контрольдә тотачак.