Менделеевскига эш сәфәре белән ТР Дәүләт Советы Рәисе Фәрид Мөхәммәтшин килде
25 февральдә Менделеевскида Татарстан Республикасы Менделеевск муниципаль районы Советының киңәйтелгән утырышы узды.
Утырыш алдыннан Татарстан Дәүләт Советы Рәисе Фәрид Мөхәммәтшин һәм Менделеевск районы Башлыгы Роберт Искәндәров җитәкчелегендәге делегация "Менделеев токымнары" 3 нче химия-технология лицеенда булды. Лицей базасында мәктәп укучылары һәм балалар бакчаларында тәрбияләнүчеләр үзләренең казанышларын күрсәттеләр. Район Башлыгы Роберт Искәндәров районда мәгариф кластеры кысаларында иртә һөнәри юнәлеш бирү концепциясенең ничек гамәлгә ашырылуы турында сөйләде. Фәрид Мөхәммәтшин заманча җиһазландырылган инновацион лабораторияләр һәм уку сыйныфлары белән танышты. Лицей педагоглары укучыларның уңышлары белән уртаклаштылар, алар химия, физика, биология һәм информатика буенча бөтенроссия һәм төбәк конкурсларында һәм олимпиадаларында даими рәвештә призлы урыннар алуларын ассызыкладылар. Шунысын да билгеләп үтәргә кирәк, нәкъ менә шушы лицейда тиздән бөтен илдән талантлы балаларны җыйган «Менделеев токымнары» химия буенча мәктәп укучыларының Бөтенроссия олимпиадасы узачак.
Аннары Фәрид Мөхәммәтшин һәм Роберт Искәндәров Советның киңәйтелгән утырышы кысаларында С.Гассар исемендәге мәдәният сараенда оештырылган күргәзмәдә булдылар.
Үз эшчәнлекләре турында беренчеләрдән булып инициатив төркемнәр активистлары - әниләр, махсус хәрби операция сугышчыларының хатыннары, битараф булмаган халык сөйләде.
Аннары тематик фотокүргәзмә фонында кунакларны Бөек Ватан сугышы ветераны Зәйнәк Әһлиев шәхсән үзе сәламләде. Фәрид Мөхәммәтшин волонтерларга рәхмәт белдерде һәм ветеран белән аралашты, аңа сәламәтлек һәм озын гомер теләде.
Шулай ук үз продукциясен Менделеевск районының үзмәшгуль гражданнары тәкъдим итте: көнкүреш химиясе, милли кием-салым һәм бизәнү әйберләре, авыл хуҗалыгы продукциясе.
Соңыннан игътибар иҗат коллективларына, балалар берләшмәләренә: быел үзенең 50 еллыгын билгеләп үтәчәк атказанган «Шаян» халык иҗаты коллективына, беренчеләр хәрәкәте активистларына, балалар бакчаларында тәрбияләнүчеләргә бирелде.
Шулай ук ТР Дәүләт Советы Рәисе, ТР Волейбол федерациясе президенты Фәрид Мөхәммәтшин Менделеевск волейбол командасына форма һәм спорт инвентаре алу өчен 100 000 сумлык сертификат тапшырды. Аннары делегация үз продукциясен тәкъдим иткән предприятиеләрнең стендларын өйрәнде: шәһәр барлыкка китерүче предприятиеләр: «Аммоний» АҖ, Л.Я. Карпов исемендәге химия заводы, Шифалы Су – Ижминводы шифаханәсе, «Алабуга» махсус икътисадый зонасы, «Менделеевск» алгарышлы социаль икътисади ]үсеш территориясе резидентлары: «Бетонмаркет» ҖЧҖ, «Спектр», «Яңа ашламалар», «СП Тант», «Менделеевск 2.0» һәм «Бондюжский»сәнәгать парклары резидентлары. Күргәзмә мәдәният, спорт, бизнес һәм социаль өлкә вәкилләрен берләштерде, халыкның бердәмлеген һәм районны актив үстерергә әзерлеген күрсәтте.
Аннары предприятие, бюджет учреждениеләре җитәкчеләре, депутатлар катнашында Менделеевск районы бБашлыгының хисап утырышы булды. Роберт Искәндәров үзенең чыгышында хәбәр иткәнчә, 2025 ел нәтиҗәләре буенча муниципалитет икътисадына кертемнәрнең гомуми күләме 4,8 миллиард сум тәшкил иткән. Төп проектлар-локомотивлар инде гамәлгә ашыру стадиясендә.
Л.Я.Карпов исемендәге химия заводында модернизация флагман проекты булып кала: предприятие электролиз хлорыннан хлор кислотасы җитештерүгә 2,5 млрд сум инвестицияли. Куәтләрне эшләтеп җибәрү заводның базардагы позициясен ныгытып кына калмыйча, өстәмә эш урыннары булдыруны да тәэмин итәчәк.
Агросәнәгать секторында «Главрыба» кооперативы алдынгылар рәтендә. Татар Чаллысы авылында балык эшкәртү цехы эшли башлады. Район үзәгендә фирма кибете ачу проектның мантыйкый дәвамы булачак, бу балык тотудан алып киштәләргә кадәр тулы цикл төзергә мөмкинлек бирәчәк.
Шулай ук махсус хәрби операциядә катнашучыларга ярдәм итү эшенә йомгак ясадылар. Махсус хәрби операция башыннан ук махсус операция уздыру зонасына 305 тоннадан артык гуманитар йөк җибәрелгән. Азык-төлек һәм беренчел кирәк-яраклардан тыш, сугышчылар автомобильләр, квадроцикллар һәм мотоцикллар, шулай ук югары технологияле җиһазлар: радиоэлектрон көрәш чаралары (РЭБ), тепловизорлар һәм квадрокоптерлар алдылар. Җибәрүләрнең шактый өлешен позицияләрне төзекләндерү өчен кирәкле төзелеш материаллары тәшкил итте.
Район Башлыгы Роберт Искәндәров еллык хисап сессиясендә белдергәнчә, яклаучылар һәм аларның гаиләләре турында кайгырту муниципалитет сәясәтенең өстенлекле юнәлеше булып кала.
"Бүген безнең якташларыбыз Россия азатлыгы һәм бәйсезлеге өчен фидакарь рәвештә көрәшәләр. Без менделеевлыларның гражданлык һәм хәрби бурычларын намус белән үтәве белән горурланабыз», — дип билгеләп үтте Роберт Искәндәров.
Социаль өлкә өчен төп яңалык хәрби хәрәкәтләрдә катнашучылар өчен махсус билгеләнгән тернәкләндерү үзәген проектлауның анонсланган башлануы булды. Яңа комплекс ветераннарның физик көчләрен торгызу урыны гына түгел, ә тыныч тормышка кайткан сугышчыларга психологик ярдәм күрсәтү һәм социаль адаптацияләү өчен төп мәйданчык та булыр дип планлаштырыла. Бу районда авыр сынаулар кичерүчеләргә ярдәм итүнең тулы канлы системасын булдырырга мөмкинлек бирәчәк.
Хисап сессиясендә Татарстан Дәүләт Советы Рәисе Фәрид Мөхәммәтшин һәм Менделеевск районы Башлыгы Роберт Искәндәров территория үсешенә өлеш керткән менделеевлыларны котладылар.
Түбән Кама муниципаль районы башлыгы Радмир Беляевка «Татарстан Республикасы Менделеевск муниципаль районының Мактаулы гражданы»исеме бирелде. Әлеге исем районны үстерүдәге зур хезмәтләре һәм анда яшәүчеләр файдасына күпьеллык нәтиҗәле хезмәтләре өчен бирелде.
Күпьеллык нәтиҗәле хезмәте, җирле үзидарә органнары эшчәнлегенең нәтиҗәлелеген күтәрүгә лаеклы өлеше өчен Менделеевск районы Песәй авыл җирлеге башлыгы Вилдан Мөхәммәтгалиев «Татарстан Республикасында җирле үзидарәне үстерүдәге казанышлары өчен» медале белән бүләкләнде.
Балалар тәрбияләүдәге һәм гаилә гореф-гадәтләрен ныгытудагы казанышлары өчен биш бала анасы Чулпан Төхбатовага «Ана даны — Материнская слава» медале тапшырылды.
Күпьеллык нәтиҗәле хезмәте һәм Татарстан Республикасы агросәнәгать комплексын үстерүгә зур шәхси өлеше өчен район авыл хуҗалыгы һәм азык-төлек идарәсенең план-икътисад бүлеге башлыгы Татьяна Бочкаревага «Татарстан Республикасының атказанган авыл хуҗалыгы хезмәткәре» дигән мактаулы исем бирелде.
Мәгариф өлкәсендәге казанышлары һәм күпьеллык намуслы хезмәте өчен «Татарстан Республикасының атказанган укытучысы» дигән мактаулы исем «Балачак планетасы» 11 нче балалар бакчасы мөдире Людмила Будникка бирелде.
Күпьеллык нәтиҗәле хезмәте, район җирле үзидарә органнары эшчәнлеген үстерүгә һәм камилләштерүгә керткән зур өлеше өчен Тойгуҗа авыл җирлеге башлыгы Рафит Сафин Татарстан Республикасы Дәүләт Советы Рәисенең Рәхмәт хаты белән бүләкләнде.
Күпьеллык нәтиҗәле хезмәте һәм ТР химия сәнәгатен үстерүгә керткән зур өлеше өчен «Аммоний» АҖ баш инженеры Эдуард Еремеев ТР Дәүләт Советы Рәисенең Рәхмәт хатына лаек булды.
Күпьеллык нәтиҗәле хезмәте һәм муниципаль милек белән идарә итүнең нәтиҗәлелеген арттыруга керткән зур өлеше өчен ТР Дәүләт Советы Рәисенең Рәхмәт хатын районның милек һәм җир мөнәсәбәтләре палатасы рәисе Наталья Антоновскаяга тапшырдылар.
Намуслы һәм нәтиҗәле хезмәте һәм Татарстан Республикасының социаль-икътисадый үсешенә зур өлеше өчен Татарстан Республикасы Министрлар Кабинетының Рәхмәте беренчел профсоюз оешмасы рәисе, «Аммоний» АҖнең социаль үсеш бүлеге башлыгы Рәйхан Сабирҗановка тапшырылды.