Менделеевскида олимпиадаларда җиңүчеләрне һәм призерларны котладылар
"Атмосфера" гөмбәзендә Бөтенроссия укучылар олимпиадасының йомгаклау һәм төбәк этапларында, шулай ук педагогларның һөнәри конкурсларында җиңүчеләрне һәм призерларны бүләкләү тантанасы булды.
Залга районның иң талантлы укучылары, аларның остазлары, әти-әниләре һәм хөрмәтле кунаклары җыелган иде.
Сәламләү сүзе белән Менделеевск районы Башлыгы Роберт Искәндәров чыгыш ясады. Ул билгеләп үткәнчә, бу уку елы район өчен иң уңышлыларның берсе булды: укучылар республика һәм Бөтенроссия олимпиадаларында 4 җиңү һәм 38 призлы урын яуладылар. Чагыштыру өчен: 2023 елда районда 1 җиңүче һәм 13 призер булган, 2024 елда - 1 җиңүче һәм 29 призер.
Беренчеләрдән булып бүләкләрне мәктәпкәчә яшьтәге балалар өчен «Галим малыш»республика олимпиадасында җиңүчеләр алды. Аннары төрле фәннәр буенча олимпиадаларда җиңүчеләрне һәм призерларны, балаларны югары нәтиҗәләргә әзерләгән педагогларны хөрмәтләделәр.
Шулай ук мәктәп директорлары, яшь белгечләр, педагогик дебют өчен грантлар һәм премияләр ияләре билгеләп үтелде. Менделеевск районында мәгариф системасына ярдәм итү дәвам итә: яңа директорларга - 200әр мең сум, яшь педагогларга 150әр мең сум түләнә.
Тантана кысаларында «Россиянең ел укытучысы - 2026» һәм «Ел тәрбиячесе - 2026» конкурсларының муниципаль этабында җиңүчеләрне бүләкләделәр. Иң яхшы тәрбияче итеп 7нче «Алтын балык» балалар бакчасыннан Александра Бакакина танылды, ә ел укытучысы итеп 1нче гимназиянең физика укытучысы Татьяна Аршаулова танылды.
Талантлы балаларга һәм педагогларга ярдәм итүгә аерым игътибар бирелә. «Аммоний» АҖ белән берлектә олимпиадаларда җиңүчеләргә, призерларга һәм аларның остазларына акчалата бүләкләр түләнә. 2026 елда бу максатларга 2,8 млн сумнан артык акча каралган, ә соңгы өч елда түләүләрнең гомуми суммасы 6,5 млн сумнан артып киткән.
Менделеевск районы талант, хезмәт һәм белемгә омтылыш, лаеклы хуплау һәм танылу алырлык шартлар тудыруын дәвам итә.