Ана йөрәге мәхәббәте

Тихоново авыл китапханәсендә Әниләр көненә багышланган «Ана йөрәге мәхәббәте» дип исемләнгән әдәби кичә үткәрелде.

Әни – кеше тормышында иң кадерле һәм яраткан нәрсә. Ничә генә яшь 5 яки 50 – сиңа һәрвакыт әни кирәк, аның мәхәббәте, назы, ягымлы карашы. Бу чарага үз балаларын тәрбияләп үстергән һәм хәзер оныкларын үстерергә булышкан тәҗрибәле әниләр җыелган иде. Китапханәче барлык җыелучыларны бәйрәм белән котлады, бәхет, сәламәтлек һәм иминлек теләде. Бу бәйрәм Россиягә каян килгән һәм башка илләрдә ничек билгеләп үтелүе турында сөйләде. Соңыннан әниләргә багышланган шигырьләр яңгырады. Чара барышында әниләр турында җырлар җырладылар һәм тыңладылар. Китапханәче Медведева Н.С. бу чарага «Әниләр көне»дип исемләнгән күргәзмә оештырды. Анда нәфис әдәбият әсәрләре, әниләр турында вакытлы матбугатта басылган язмалар тәкъдим ителде. Җыелучылар шагыйрьләр, язучылар һәм рәссамнар иҗат иткән әни образы белән таныштылар.  Муханова А. Н. әниләр турындагы әсәрләрдән өзекләр укыды. Җирле шагыйрә, күп балалы әни Рәисә Николаевна Коренекның рәсемнәр күргәзмәсе күрсәтелде, ул 5 бала үстергән, медаль белән бүләкләнгән һәм барлык чараларда да үзенең шигырьләре белән сөендерә. Кич буе әниләр адресына иң ихлас һәм изге сүзләр яңгырады. Музыкаль күренешләр һәм күңелле конкурслар барлык катнашучыларны бәйрәм атмосферасына чумдырды. Шулай ук чарада катнашкан һәр кеше үз тормышы, балалары турында сөйләде һәм, әлбәттә, әниләрен искә төшерде.  Бу көнне берәү дә читтә калмады. Ә чара ахырында барысы да бәйрәм өстәле артына җыелды. Бәйрәмнән әниләр күтәренке кәеф белән, елмаеп, көн кадагындагы проблемаларны онытып киттеләр.