1 августка кадәр Татарстан эш бирүчеләре хезмәтне саклау чыгымнарын компенсацияләүгә гариза бирә ала
Һәр иминиятләштерүче җитештерү һәлакәтен һәм һөнәри авыруларны киметү чараларын гамәлгә ашыруга чыгымнарны мәҗбүри социаль иминият акчалары исәбеннән киметү мөмкинлегенә ия. 2024 елда хезмәтне саклауга чыгымнарны компенсацияләү өчен Россия Социаль фондының Татарстан Республикасы буенча бүлегенә 716 эш бирүче мөрәҗәгать иткән инде.
Кисәтү чараларын финанс белән тәэмин итүне эш бирүчеләр үз акчалары исәбеннән гамәлгә ашыралар, ә аннары аларны кайтаруны сорапРоссия Социаль фондының Татарстан Республикасы буенча бүлегенә мөрәҗәгать итәләр. Компенсация алу өчен 1 августка кадәр Россия Социаль фондының Татарстан Республикасы буенча бүлекчәсенең клиент хезмәтләренә тиешле гариза бирергә, ә кисәтү чараларын үтәгәннән соң, 15 декабрьгә кадәр күрсәтелгән максатларга тотылган чыгымнар турында хисап бирергә кирәк. Гаризаны һәм документлар пакетын дәүләт хезмәтләре порталында, почта аша, шулай ук Россия Социаль фондының Татарстан Республикасы буенча бүлекчәсенә клиент хезмәтләрендә шәхси кабул итүдә тапшырырга мөмкин.
"Кагыйдәләр нигезендә, эш бирүче җитештерүдәге бәхетсезлек очракларыннан һәм алдагы календарь елы өчен исәпләнгән һөнәри авырулардан иминият кертемнәренең 20% ка кадәр суммасын кире кайтара ала. Әгәр иминиятләштерүче пенсия яшендәге һәм пенсия алды яшендәге хезмәткәрләрне шифаханә-курортта дәвалауга өстәмә акча җибәрсә, чыгымнарны каплау 30% ка кадәр арттырылырга мөмкин. Компенсация алу өчен эш бирүченең иминият кертемнәре буенча бурычлары, түләнмәгән пенялар һәм штрафлар булмавы мөһим таләп булып тора. 2023 елда Татарстан Республикасында 1608 оешма бу хезмәттән файдаланган», — дип аңлатты Россия Социаль фондының Татарстан Республикасы буенча бүлекчәсе идарәчесе Эдуард Вафин.
2024 елда төбәк иминиятчеләре Социаль иминият акчаларын җибәрергә хокуклы 17 юнәлеш каралган. 2023 елда Татарстан эш бирүчеләре арасында түбәндәге юнәлешләргә ихтыяҗ аеруча зур булган:
- хезмәткәрләргә мәҗбүри медицина тикшерүе үткәрү (2023 елда 114.1 млн. сум),
- пенсия алды (пенсия яшендәге) хезмәткәрләрне шифаханә-курортта дәвалауга (2023 елда 190,7 млн. сум);
- индивидуаль яклауның сертификацияләнгән чараларын сатып алу (2023 елда 171,5 млн. сум);
- хезмәт шартларына махсус бәя бирү (2023 елда 24,8 млн.сум).
Быелдан 2024 елның 19 мартындагы 123н номерлы боерыгы үз көченә кергәч, иминиятләштерүчеләрнең һөнәри куркынычларны бәяләү чыгымнарын компенсацияләү мөмкинлеге барлыкка килде.
Гаризаны карау статусын онлайн рәвештә Россия Социаль фондының Татарстан Республикасы буенча бүлекчәсе сайтында «иминиятләштерүчеләргә» бүлегендә тикшерергә мөмкин.
Иминиятләштерүчеләр өчен төбәк элемтә үзәгенең телефоны: 8 (843) 279-27-66 .